Publikohet raporti i BE’së: Kosova në mesin e vendeve me më shumti raste të reja me koronavirus

Bashkimi Europian përmes Qendrës për kontrollimin e sëmundjeve sot ka publikuar vlerësimin e rrezikut nga koronavirusi. Kosova në këtë raport, është e treta me incidencën më të lartë, ku në 100.000 banorë janë shënuar 66.2 raste të reja me koronavirus.

Ky raport është publikuar nga mikrobiologu Lul Raka, i cili theksoi se nga ky publikim, incidenca e sëmundjes është ulur për 12 për qind në Europë.

Shkrimi i plotë i Rakës:

BASHKIMI EVROPIAN, PËRMES EUROPEAN CENTER FOR DISEASE CONTROL, SOT MË 2.7.2020 PUBLIKOI VLERËSIMIN RAPID TË RREZIKUT PËR EU/EEA, BRITANINË DHE BALLKANIN PERËNDIMOR

• Gjatë 2 javëve të fundit (16-30 Qershor 2020), incidenca e sëmundjes COVID-19 në Evropë është ulur për 12%
• 3 shtetet me incidencën më të lartë janë:

– Suedia me 149.4 raste në 100.000 banorë,

– Maqedonia me 99.5/100.000 banorë dhe

– Kosova me 66.2 raste në 100.000 banorë

OPSIONET PËR PËRGJIGJE:

• Kornizë e fortë e monitorimit, për të përcjellë situatën epidemiologjike, për zbulimin e shpejtë të rritjes së transmetimit, dhe për vlerësimin e ndikimit të intervenimeve të kryera.

• Strategji e zgjeruar e testimit, që synon testimin gjithëpërfshirës të të gjithë individëve që shfaqin simptoma të COVID-19.
• Kornizë për gjurmimin e kontakteve, të bazuar në testime të gjera, gjetjen aktive të rasteve, zbulim të hershëm të rasteve, izolimin dhe karantinimin e tyre dhe përcjelljen e vazhdueshme të kontakteve.

• Identifikimi i shpejtë dhe hetimi i vatrave të epidemisë të lidhura me mjedise specifike, me zbatimin e masave të rregullta parandalimit dhe kontrollit .

• zbatimi i qëndrueshëm dhe afatgjatë i masave jofarmaceutike (distancë fizike, maskë, higjienë e duarve)

• Strategji e fortë e komunikimit të rrezikut, me të cilën duhet t’i rikujtojë qytetarët se pandemia nuk ka mbaruar.